門路專訪 – 髮再生創辦人黃創安先生 Anderson Wong

門路專訪 – 髮再生創辦人黃創安先生 Anderson Wong

脫髮引申再度創業 中年危機變新商機

俗語話「十個光頭九個富」，相信喺未富貴之前，男人都唔想見到自己冇晒頭髮。髮再生創辦人黃創安原本經營製衣生意，仲做得有聲有色，但要面對住突然要「玩完」嘅局面，壓力令佢晚晚失眠，日日諗點樣可以再創另一番事業，結果搞到甩頭髮。當年45歲嘅佢，喺面臨住生意失敗同光頭危機嘅時侯，卻又俾佢發現咗另一個契機。朋友介紹佢到國內睇中醫，佢發現診所客似雲來，專門幫人醫治脫髮問題，就知道呢個係一門好值得投資嘅生意。開頭以為推出生髮產品好容易，殊不知係一重又一重嘅難度挑戰，幾經辛苦搞掂產品質量，用家讚有功效，但政府突然立例中成藥產品要註冊，即係話又要使多一大嚿錢，後來仲要面對沙士時期冇生意嘅慘淡經營。古語有云「窮則變、變則通、通則久」，究竟黃創安用咗咩明智決定將生意化險為夷？

https://www.munroads.com/p/1119/channel/entrepreneur/脫髮引申再度創業+中年危機變新商機

賺錢心態要健康 令客人「有希望」才最值錢

甩頭髮係咪真係冇得醫？一聽到「冇得醫」呢三個字，簡直覺得「人生冇希望」。髮再生創辦人黃創安話好多客人喺佢哋公司做完療程後，畀錢時仲會同佢哋講多謝，令佢更加相信能夠畀到人希望係最重要。黃創安由45歲開始埋手鑽研如何可以透過「三千煩惱絲」做生意，當中佢亦經歷咗唔少挑戰，除咗要不斷研發儀器配合療程，仲要諗唔同嘅宣傳方法，最終佢選擇喺電台落廣告，仲同DJ一齊開咪向大眾推廣及解釋頭髮護理知識，打造出專家形象，亦大大增加咗宣傳效益。佢話生意人嘅心態有好多，有啲人為錢，有啲人為面子，但佢只想賺錢之餘又可以幫到人，幫到嘅唔只係令佢哋出返啲頭髮同解決頭皮健康問題，原來仲可以改善種種人際關係同自卑感。宜家好多中小企都偏向精減人手，黃創安坦言佢哋呢種手作行業，員工亦係公司重要資產之一，有好員工先至令佢有能力繼續開拓發展。

https://www.munroads.com/p/1140/channel/entrepreneur/賺錢心態要健康+令客人「有希望」才最值錢